آنکھ کیوں اپنی مل رہے ہو تم

آنکھ کیوں اپنی مل رہے ہو تم

ہو کے پتھر پگھل رہے ہو تم

آرزو بن کے دل میں اترے تھے

بن کے آنسو نکل رہے ہو تم

چھوڑتے کیوں نہیں ہو بغض و حسد

کیوں جہنم میں جل رہے ہو تم

کیا کوئی یاد آ رہا ہے تمہیں

کروٹیں کیوں بدل رہے ہو تم

میرے بھائی ہو اور میرے خلاف

زہر کتنا اگل رہے ہو تم

وہ کھلونا تو مل چکا ہے تمہیں

جس کی خاطر مچل رہے ہو تم

ماں پیاسی پڑی ہے بستر پر

لقمۂ تر نگل رہے ہو تم

آج یہ التفات حمزہؔ پر

لگ رہا ہے پھسل رہے ہو تم