aankh mein KHwab zamane se alag rakkha hai

aañkh meñ ḳhvāb zamāne se alag rakkhā hai

aks ko ā.ina-ḳhāne se alag rakkhā hai

ghar meñ gul-dān sajā.e haiñ tirī aamad par

aur ik phuul bahāne se alag rakkhā hai

kuchh havā meñ bhī chalāne ke liye rakkhā jaa.e

is liye tiir nishāne se alag rakkhā hai

us ke hoñToñ ko nahīñ aañkh ko dī hai tarjīh

pyaas ko pyaas bujhāne se alag rakkhā hai

ġhair-mumkin hai kisī aur ke haath aa jaa.e

vo ḳhazāna jo ḳhazāne se alag rakkhā hai

ik havā sī kahīñ bāñdhī hai chhupāne ke liye

ik tamāshā sā lagāne se alag rakkhā hai

ḳhvāb hī ḳhvāb meñ ta.amīr kiyā hai 'āzar'

ghar ko buniyād uThāne se alag rakkhā hai

aankh mein KHwab zamane se alag rakkha hai

aks ko aaina-KHane se alag rakkha hai

ghar mein gul-dan sajae hain teri aamad par

aur ek phul bahane se alag rakkha hai

kuchh hawa mein bhi chalane ke liye rakkha jae

is liye tir nishane se alag rakkha hai

us ke honTon ko nahin aankh ko di hai tarjih

pyas ko pyas bujhane se alag rakkha hai

ghair-mumkin hai kisi aur ke hath aa jae

wo KHazana jo KHazane se alag rakkha hai

ek hawa si kahin bandhi hai chhupane ke liye

ek tamasha sa lagane se alag rakkha hai

KHwab hi KHwab mein tamir kiya hai 'azar'

ghar ko buniyaad uThane se alag rakkha hai