aankh se aansu Tapakta jae hai

aañkh se aañsū Tapaktā jaa.e hai

har musāfir sar paTaktā jaa.e hai

nāzukī kyā kahiye nāzuk phuul kī

bār-e-shabnam se lachaktā jaa.e hai

zaḳhm-e-dil ham ne chhupāyā to magar

phuul kī sūrat mahaktā jaa.e hai

kah rahā huuñ maiñ to apnī dāstāñ

kyoñ tumhārā dil dhaḌaktā jaa.e hai

jab bujhānā chāhtā huuñ ġham kī aag

aur bhī sho.ala bhaḌaktā jaa.e hai

lab pe nāseh ke nasīhat hai magar

haath meñ sāġhar chhalaktā jaa.e hai

dīda-e-maqtūl meñ ab kis liye

aks qātil kā jhalaktā jaa.e hai

raah meñ pahle bhaTaktā thā 'azīz'

ab sar-e-manzil bhaTaktā jaa.e hai

aankh se aansu Tapakta jae hai

har musafir sar paTakta jae hai

nazuki kya kahiye nazuk phul ki

bar-e-shabnam se lachakta jae hai

zaKHm-e-dil hum ne chhupaya to magar

phul ki surat mahakta jae hai

kah raha hun main to apni dastan

kyon tumhaara dil dhaDakta jae hai

jab bujhana chahta hun gham ki aag

aur bhi shoala bhaDakta jae hai

lab pe naseh ke nasihat hai magar

hath mein saghar chhalakta jae hai

dida-e-maqtul mein ab kis liye

aks qatil ka jhalakta jae hai

rah mein pahle bhaTakta tha 'aziz'

ab sar-e-manzil bhaTakta jae hai