aankh se jhaDne lage ruKHsar ko mahka gae

aañkh se jhaḌne lage ruḳhsār ko mahkā ga.e

kuchh sitāre ratjagoñ kī dastaras meñ aa ga.e

be-mahal sī guftugū se rāste bujhne lage

mere hamrāhī mire afkār ko bhī khā ga.e

jabr kaise rok pā.egā na.ī tā'bīr ko

ḳhvāb jab āñkhoñ kī dīvāroñ se bāhar aa ga.e

maiñ tumhāre shahr se guzrā to kuchh aise lagā

dil udāsī aa.ina patthar baham Takrā ga.e

dard ke peḌoñ pe baiThe jugnuoñ kī ḳhair ho

bebasī ke dasht meñ ummīd thāme aa ga.e

chāñdnī aur dasht kā kuchh to ta'alluq hai 'safī'

be-sabab yūñhī nahīñ palkoñ pe motī chhā ga.e

aankh se jhaDne lage ruKHsar ko mahka gae

kuchh sitare ratjagon ki dastaras mein aa gae

be-mahal si guftugu se raste bujhne lage

mere hamrahi mere afkar ko bhi kha gae

jabr kaise rok paega nai ta'bir ko

KHwab jab aankhon ki diwaron se bahar aa gae

main tumhaare shahr se guzra to kuchh aise laga

dil udasi aaina patthar baham Takra gae

dard ke peDon pe baiThe jugnuon ki KHair ho

bebasi ke dasht mein ummid thame aa gae

chandni aur dasht ka kuchh to ta'alluq hai 'safi'

be-sabab yunhi nahin palkon pe moti chha gae