aankh shair ki ho pur-nam to ghazal hoti hai

aañkh shā.ir kī ho pur-nam to ġhazal hotī hai

yād-e-jānāñ kā ho aalam to ġhazal hotī hai

saañs chhupne lage nashtar kī tarah siine meñ

dil ko taḌpā.e shab-e-ġham to ġhazal hotī hai

kabhī chhā jaa.e añdherā kabhī chamke mahtāb

zulf us ruḳh pe ho barham to ġhazal hotī hai

merī jānib mire saaqī kī ho maḳhmūr nazar

aur ho kaif kā aalam to ġhazal hotī hai

shab-e-mahtāb ho jazbāt hoñ aur sehn-e-chaman

husn aise meñ ho hamdam to ġhazal hotī hai

yak-ba-yak kānoñ meñ aane lage āvāz-e-sarosh

zindagī chheḌ de sargam to ġhazal hotī hai

ruuh masrūr ho ehsās ke sannāTe meñ

dāman-e-gul pe ho shabnam to ġhazal hotī hai

dekh kar chaak mire jaib-o-garebāñ 'shabbīr'

hañs paḌe husn-e-mujassam to ġhazal hotī hai

aankh shair ki ho pur-nam to ghazal hoti hai

yaad-e-jaanan ka ho aalam to ghazal hoti hai

sans chhupne lage nashtar ki tarah sine mein

dil ko taDpae shab-e-gham to ghazal hoti hai

kabhi chha jae andhera kabhi chamke mahtab

zulf us ruKH pe ho barham to ghazal hoti hai

meri jaanib mere saqi ki ho maKHmur nazar

aur ho kaif ka aalam to ghazal hoti hai

shab-e-mahtab ho jazbaat hon aur sehn-e-chaman

husn aise mein ho hamdam to ghazal hoti hai

yak-ba-yak kanon mein aane lage aawaz-e-sarosh

zindagi chheD de sargam to ghazal hoti hai

ruh masrur ho ehsas ke sannaTe mein

daman-e-gul pe ho shabnam to ghazal hoti hai

dekh kar chaak mere jaib-o-gareban 'shabbir'

hans paDe husn-e-mujassam to ghazal hoti hai