aankh unki nahin daricha hai

aañkh un kī nahīñ darīcha hai

is darīche meñ ḳhud ko dekhā hai

dil pe nashtar chalā ke pūchhte haiñ

hāl-e-dil ab janāb kaisā hai

bhūkā sab ko uThātā vo lekin

bhūkā hargiz nahīñ sulātā hai

dost hī tazkira nahīñ karte

dushmanoñ meñ bhī merā charchā hai

vo ġharīboñ ko daan kyā kartā

dharm īmān jis kā paisa hai

merī fitrat se vo judā niklā

yuuñ to kahne ko merā beTā hai

mahñgā ab to yahāñ hai paanī tak

ḳhūn-e-insāñ baḌā hī sastā hai

tū ne jis ko samajh liyā apnā

terī nazroñ kā sirf dhokā hai

bistar-e-marg par hai baap magar

beTā sasurāl jā ke baiThā hai

vo baḌā dil-jalā hī hogā 'ayāz'

juutā Bush par jo us ne pheñkā hai

aankh un ki nahin daricha hai

is dariche mein KHud ko dekha hai

dil pe nashtar chala ke puchhte hain

haal-e-dil ab janab kaisa hai

bhuka sab ko uThata wo lekin

bhuka hargiz nahin sulata hai

dost hi tazkira nahin karte

dushmanon mein bhi mera charcha hai

wo gharibon ko dan kya karta

dharm iman jis ka paisa hai

meri fitrat se wo juda nikla

yun to kahne ko mera beTa hai

mahnga ab to yahan hai pani tak

KHun-e-insan baDa hi sasta hai

tu ne jis ko samajh liya apna

teri nazron ka sirf dhoka hai

bistar-e-marg par hai bap magar

beTa sasural ja ke baiTha hai

wo baDa dil-jala hi hoga 'ayaz'

juta Bush par jo us ne phenka hai