aankh uThai nahin wo samne sau bar hue

aañkh uThā.ī nahīñ vo sāmne sau baar hue

hijr meñ aise farāmush-gar-e-dīdār hue

kāmil us firqa-e-zuhhād meñ uThā na koī

kuchh hue to yahī rindān-e-qadah ḳhvār hue

na uThī baiTh ke ḳhaak apnī tire kūche meñ

ham na yaañ dosh-e-havā ke bhī kabhī yaar hue

sub.h le aa.ina us but ko dikhāyā ham ne

raat aġhyār se milne ke jo inkār hue

kuchh ta.ajjub nahīñ gar ab ke falak TuuT paḌe

aaj naale jo koī aur bhī do-chār hue

misr meñ aaj tujhe dekh ke pachhtā.e haiñ

sāda-lauhī se jo yūsuf ke ḳharīdār hue

mubtazil maiñ hī to huuñ aap jo kahiye sach hai

raat jhagḌe to mujhī par sar-e-bāzār hue

ye haiñ 'āzurdā' jo kahte hue shai.an-allāh

aaj daryūza-gar-e-ḳhāna-e-ḳhummar hue

aankh uThai nahin wo samne sau bar hue

hijr mein aise faramush-gar-e-didar hue

kaamil us firqa-e-zuhhad mein uTha na koi

kuchh hue to yahi rindan-e-qadah KHwar hue

na uThi baiTh ke KHak apni tere kuche mein

hum na yan dosh-e-hawa ke bhi kabhi yar hue

subh le aaina us but ko dikhaya hum ne

raat aghyar se milne ke jo inkar hue

kuchh tajjub nahin gar ab ke falak TuT paDe

aaj nale jo koi aur bhi do-chaar hue

misr mein aaj tujhe dekh ke pachhtae hain

sada-lauhi se jo yusuf ke KHaridar hue

mubtazil main hi to hun aap jo kahiye sach hai

raat jhagDe to mujhi par sar-e-bazar hue

ye hain 'azurda' jo kahte hue shaian-allah

aaj daryuza-gar-e-KHana-e-KHummar hue