aankhen use DhunDengi tamasha nahin hoga

āñkheñ use DhūñDeñgī tamāshā nahīñ hogā

vo dekheñge ham jo kabhī dekhā nahīñ hogā

ik ḳhvāb zar-o-sīm se ghar bhar ga.e saare

ab koī yahāñ niiñd kā maarā nahīñ hogā

dil hogā nahīñ hogā kisī yaad kā maskan

so bām-e-talab par koī chehra nahīñ hogā

ham hoñge nahīñ hoñge tire shām-o-sahar meñ

lekin tujhe is baat kā dhaḌkā nahīñ hogā

ye sar ki bharā hogā farāvānī-e-shab se

phir tā-ba-abad dil meñ ujālā nahīñ hogā

ye ḳhvāb sā manzar hai bas ik 'umr kā mehmāñ

phir hashr talak is kā nazāra nahīñ hogā

phir kis liye ham zahmat-e-ummīd uThā.eñ

is shahr meñ jab koī bhī tujh sā nahīñ hogā

bhar jā.eñge ik roz sabhī ghaav hamāre

ai dard-e-mohabbat tirā chārā nahīñ hogā

aankhen use DhunDengi tamasha nahin hoga

wo dekhenge hum jo kabhi dekha nahin hoga

ek KHwab zar-o-sim se ghar bhar gae sare

ab koi yahan nind ka mara nahin hoga

dil hoga nahin hoga kisi yaad ka maskan

so baam-e-talab par koi chehra nahin hoga

hum honge nahin honge tere sham-o-sahar mein

lekin tujhe is baat ka dhaDka nahin hoga

ye sar ki bhara hoga farawani-e-shab se

phir ta-ba-abad dil mein ujala nahin hoga

ye KHwab sa manzar hai bas ek 'umr ka mehman

phir hashr talak is ka nazara nahin hoga

phir kis liye hum zahmat-e-ummid uThaen

is shahr mein jab koi bhi tujh sa nahin hoga

bhar jaenge ek roz sabhi ghaw hamare

ai dard-e-mohabbat tera chaara nahin hoga