آنکھوں آنکھوں کٹ گئی رات

آنکھوں آنکھوں کٹ گئی رات

دل کی دل میں رہ گئی بات

طعنے تہمت الزامات

عشق نے بخشی یہ سوغات

گیسو ابرو عارض لب

حسن کے دل کش موضوعات

عشوے غمزے ناز و ادا

حسن کے کیا کیا عنوانات

یادیں سپنے آنسو کرب

عشق کے اپنے معمولات

اکڑی چھکڑی بھولا ہے

دل نے کھائی ایسی مات

قابو پانا مشکل ہے

ایسے مچلے ہیں جذبات

کوٹھوں کوٹھوں چڑھتی ہے

منہ سے جب بھی نکلے بات

مجھ پر ان کی چشم کرم

اس کے کب ہیں امکانات

آہیں آنسو صدمے غم

مجھ پر ان کے احسانات

کس نے کیا کیا پایا ہے

اپنی اپنی توفیقات

دنیا کیسی لگتی ہے

اپنے اپنے محسوسات

جس کی لاٹھی اس کی بھینس

ساری دنیا کے حالات

دور حاضر میں ببیاکؔ

ہم جیسوں کی کیا اوقات