آنکھوں آنکھوں میں اشارات الف سے ی تک

آنکھوں آنکھوں میں اشارات الف سے ی تک

سہمے سہمے سے ہیں جذبات الف سے ی تک

شب کے سینے میں لرزتی ہیں کراہیں پل پل

دن کے ہونٹوں پہ ہیں نغمات الف سے ی تک

جسم سے چپکے ہوئے ریشمی کپڑے اس کے

یاد آتی ہے وہ برسات الف سے ی تک

آہٹیں دھڑکنیں بے چینیاں آنکھیں نیندیں

کیسے گزری ہے مری رات الف سے ی تک

آج سورج کے دریچوں سے نکل آئے گا چاند

ہے عجب حسن ملاقات الف سے ی تک

نام تعلیم پتہ عمر مشاغل پیشہ

کیسے کیسے تھے سوالات الف سے ی تک

اجنبی لفظ تھکا لہجہ شکستہ مفہوم

کون سمجھے گا مری بات الف سے ی تک