آنکھوں کا ہے قصور اگر وہ عیاں نہیں

آنکھوں کا ہے قصور اگر وہ عیاں نہیں

ورنہ تو کس مکاں میں مکیں لا مکاں نہیں

ہر شے کا کچھ نہ کچھ یہاں مقصد ضرور ہے

اس کائنات میں کہیں کچھ رائیگاں نہیں

حد ہے اگر تو سنگ تراشوں کے فن کی ہے

پتھر میں ورنہ صورتیں کیا کیا نہاں نہیں

حد نظر ہے جس پہ ہے چھت کا گماں ہمیں

ورنہ زمیں کے سر پہ کوئی آسماں نہیں

مجھ میں نہ رنگ ڈھونڈئیے غالبؔ یا میرؔ کا

ملتا کسی سے بھی مرا طرز بیاں نہیں

کیا لطف شاعری کا اٹھائیں گے بد نصیب

سیکھی جنہوں نے اے صداؔ اردو زباں نہیں