aankhon ko hum aasman kahenge

āñkhoñ ko ham āsmāñ kaheñge

ashkoñ ko bhī kahkashāñ kaheñge

hasrat ko nigah kaheñge phir ham

nazzāre ko imtihāñ kaheñge

dil ko bhī kaheñge rahguzar ham

aur dard ko kārvāñ kaheñge

kis kis ko sunā.eñge tirā ġham

kis kis se ye dāstāñ kaheñge

is raah meñ dil luTā diyā hai

ab ham ye kahāñ kahāñ kaheñge

kūche meñ jab aaoge hamāre

dil se tumheñ mehmāñ kaheñge

tanhā.ī meñ chauñk uTTheñge yak-dam

aahaT ko faqat gumāñ kaheñge

āvāz pe kaun Thertā hai

ruk jā.eñge ham jahāñ kaheñge

āsān kahāñ thī dastaras bhī

koshish ko bhī rā.egāñ kaheñge

marzī hai tumhārī jo kaho tum

ham ziist ko bas fuġhāñ kaheñge

hangāma-e-roz-o-shab ko ya.anī

be-intihā mehrbāñ kaheñge

aankhon ko hum aasman kahenge

ashkon ko bhi kahkashan kahenge

hasrat ko nigah kahenge phir hum

nazzare ko imtihan kahenge

dil ko bhi kahenge rahguzar hum

aur dard ko karwan kahenge

kis kis ko sunaenge tera gham

kis kis se ye dastan kahenge

is rah mein dil luTa diya hai

ab hum ye kahan kahan kahenge

kuche mein jab aaoge hamare

dil se tumhein mehman kahenge

tanhai mein chaunk uTThenge yak-dam

aahaT ko faqat guman kahenge

aawaz pe kaun Therta hai

ruk jaenge hum jahan kahenge

aasan kahan thi dastaras bhi

koshish ko bhi raegan kahenge

marzi hai tumhaari jo kaho tum

hum zist ko bas fughan kahenge

hangama-e-roz-o-shab ko yani

be-intiha mehrban kahenge