آنکھوں کو تھی جو خوب سے بھی خوب تر تلاش

آنکھوں کو تھی جو خوب سے بھی خوب تر تلاش

کر پایا آج تک نہ کوئی ہم سفر تلاش

ہر آدمی ہے زعم قیادت میں مبتلا

کس سے کہوں کہ میرے لیے راہبر تلاش

ڈستے ہیں ہر قدم پہ مسائل کے کالے ناگ

اب اور دشت شہر میں اجگر نہ کر تلاش

چہروں کی بھیڑ میں بھی جو پہچان لے تجھے

بجلی کے قہقہوں میں نہ کر وہ نظر تلاش

لفظوں کے تیر ترکش لب میں رکھے ہیں سب

یاروں کی آستین میں خنجر نہ کر تلاش

جل کے جو خاک ہو گئی اس کا نہ کر ملال

کر لے چمن میں دوسری شاخ شجر تلاش

آتا ہے سب نظر مگر آتا نہیں نظر

کرتے ہیں کچھ بہانہ مرے چارہ گر تلاش