آنکھوں میں اشک ہونٹوں پہ جاں دیکھتے رہے

آنکھوں میں اشک ہونٹوں پہ جاں دیکھتے رہے

کتنے مزے کا سوز نہاں دیکھتے رہے

ہر سمت اس کا حسن عیاں دیکھتے رہے

اور ماورائے کون و مکاں دیکھتے رہے

دل کے علاوہ ڈھونڈا اسے ہر مقام پر

تسکین دل کہاں تھی کہاں دیکھتے رہے

ہر ذرۂ خراب میں لاکھوں تھیں بجلیاں

ہم بے قرار نبض جہاں دیکھتے رہے

ہم پر کرم کے بدلے میں ہوتے رہے ستم

ہم عہد گل میں دور خزاں دیکھتے رہے

ظاہرؔ کمال دیکھیے ابنائے وقت کا

ہوتی رہی تباہ زباں دیکھتے رہے