آنکھوں میں اشک لا کے گنہ گار ہو گئے

آنکھوں میں اشک لا کے گنہ گار ہو گئے

خوابوں کے سارے قصر بھی مسمار ہو گئے

تم قتل بھی کرو تو کوئی تذکرہ نہیں

ہم لب کشا ہوئے تو خطا‌ وار ہو گئے

کل تک غبار راہ بھی جن کو نہ تھی نصیب

وہ لوگ آج قافلہ سالار ہو گئے

بیٹھے ہیں لوگ گھر میں دکانیں لئے ہوئے

کوچے ہمارے شہر کے بازار ہو گئے

پھر سے تباہ ہوگی یہ دنیا کی انجمن

طوفان نوح آنے کے آثار ہو گئے

اچھے بھلے تھے تم سے اگر ہم ملے نہ تھے

تم سے ملے تو مفت میں بیمار ہو گئے