aankhon mein ek tabassum-e-pinhan ka aks hai

āñkhoñ meñ ik tabassum-e-pinhāñ kā aks hai

chehre pe ek jalva-e-raqsāñ kā aks hai

chashm-e-ġhazāl nargis-e-fattāñ kā aks hai

phūloñ kī sāḳht us lab-e-ḳhandāñ kā aks hai

zulfoñ meñ tīrgī hai amāvas kī raat kī

gāloñ pe jaise sub.h-e-bahārāñ kā aks hai

vo chehra jis se ḳhūbī-e-naqqāsh hai ayaañ

vo chehra jis pe sūra-e-rahmāñ kā aks hai

abrū ko taan rakkhā hai shamshīr kī tarah

mizhgāñ haiñ yā ki ḳhanjar-e-uryāñ kā aks hai

tarshe hue gulāb se yāqūt-rang lab

chāh-e-zaqan hai yā mah-e-tābāñ kā aks hai

dandāñ kī raushnī hai sitāroñ se musta.ār

yā phir nujūm meñ tire dandāñ kā aks hai

qāmat milī hai sarv ko us sarv-qad ke baad

peche kā pech kākul-e-pechāñ kā aks hai

āveza-hā-e-gosh meñ taare jaḌe hue

āñchal meñ sad hazār charāġhāñ kā aks hai

mausūm hai qayām-e-qayāmat se terī chaal

mahshar tujh aise fitna-badāmāñ kā aks hai

mushk-e-ḳhutan sā mahkā huā marmarīñ badan

poshāk hai ki mahr-e-daraḳhshāñ kā aks hai

vo dekhte haiñ ham ko kan-añkhiyoñ se bazm meñ

chehre pe ik ḳhayāl-e-pareshāñ kā aks hai

ye kā.enāt ā.īna-ḳhāna yuuñ hī nahīñ

shash-samt tere husn-e-farāvāñ kā aks hai

shaffāf āsmāñ pe ba-vaqt-e-tulūa-e-shams

us mah-jabīñ ke nūr-e-numāyāñ kā aks hai

is ko mubālaġha na kaheñ aap to hai arz

bāġh-e-bahisht kūcha-e-jānāñ kā aks hai

aankhon mein ek tabassum-e-pinhan ka aks hai

chehre pe ek jalwa-e-raqsan ka aks hai

chashm-e-ghazal nargis-e-fattan ka aks hai

phulon ki saKHt us lab-e-KHandan ka aks hai

zulfon mein tirgi hai amawas ki raat ki

galon pe jaise subh-e-bahaaran ka aks hai

wo chehra jis se KHubi-e-naqqash hai ayan

wo chehra jis pe sura-e-rahman ka aks hai

abru ko tan rakkha hai shamshir ki tarah

mizhgan hain ya ki KHanjar-e-uryan ka aks hai

tarshe hue gulab se yaqut-rang lab

chah-e-zaqan hai ya mah-e-taban ka aks hai

dandan ki raushni hai sitaron se mustaar

ya phir nujum mein tere dandan ka aks hai

qamat mili hai sarw ko us sarw-qad ke baad

peche ka pech kakul-e-pechan ka aks hai

aaweza-ha-e-gosh mein tare jaDe hue

aanchal mein sad hazar charaghan ka aks hai

mausum hai qayam-e-qayamat se teri chaal

mahshar tujh aise fitna-badaman ka aks hai

mushk-e-KHutan sa mahka hua marmarin badan

poshak hai ki mahr-e-daraKHshan ka aks hai

wo dekhte hain hum ko kan-ankhiyon se bazm mein

chehre pe ek KHayal-e-pareshan ka aks hai

ye kaenat aaina-KHana yun hi nahin

shash-samt tere husn-e-farawan ka aks hai

shaffaf aasman pe ba-waqt-e-tulua-e-shams

us mah-jabin ke nur-e-numayan ka aks hai

is ko mubaalagha na kahen aap to hai arz

bagh-e-bahisht kucha-e-jaanan ka aks hai