آنکھوں میں اک تبسم پنہاں کا عکس ہے

آنکھوں میں اک تبسم پنہاں کا عکس ہے

چہرے پہ ایک جلوۂ رقصاں کا عکس ہے

چشم غزال نرگس فتاں کا عکس ہے

پھولوں کی ساخت اس لب خنداں کا عکس ہے

زلفوں میں تیرگی ہے اماوس کی رات کی

گالوں پہ جیسے صبح بہاراں کا عکس ہے

وہ چہرہ جس سے خوبی نقاش ہے عیاں

وہ چہرہ جس پہ سورۂ رحماں کا عکس ہے

ابرو کو تان رکھا ہے شمشیر کی طرح

مژگاں ہیں یا کہ خنجر عریاں کا عکس ہے

ترشے ہوئے گلاب سے یاقوت رنگ لب

چاہ ذقن ہے یا مہ تاباں کا عکس ہے

دنداں کی روشنی ہے ستاروں سے مستعار

یا پھر نجوم میں ترے دنداں کا عکس ہے

قامت ملی ہے سرو کو اس سرو قد کے باد

پیچے کا پیچ کاکل پیچاں کا عکس ہے

آویزہ ہائے گوش میں تارے جڑے ہوئے

آنچل میں صد ہزار چراغاں کا عکس ہے

موسوم ہے قیام قیامت سے تیری چال

محشر تجھ ایسے فتنہ بداماں کا عکس ہے

مشک ختن سا مہکا ہوا مرمریں بدن

پوشاک ہے کہ مہر درخشاں کا عکس ہے

وہ دیکھتے ہیں ہم کو کن انکھیوں سے بزم میں

چہرے پہ اک خیال پریشاں کا عکس ہے

یہ کائنات آئینہ خانہ یوں ہی نہیں

شش سمت تیرے حسن فراواں کا عکس ہے

شفاف آسماں پہ بوقت طلوع شمس

اس مہ جبیں کے نور نمایاں کا عکس ہے

اس کو مبالغہ نہ کہیں آپ تو ہے عرض

باغ بہشت کوچۂ جاناں کا عکس ہے