aankhon mein jitne chahe samundar bula ke rakh

āñkhoñ meñ jitne chāhe samundar bulā ke rakh

ḳhāk-e-zamīñ se ashk tū apne bachā ke rakh

de shakl koī miTTī ko dast-e-hunar-shanās

koshish ke chaak par abhī ḳhvāhish chaḌhā ke rakh

nāyāb chāhatoñ kā ḳhazāna hai ḳhud vo zaat

maañ kī hathelī chuum ke us par kamā ke rakh

mehnat se sab sameT tū duniyā kā sīm-o-zar

aur sin-rasīda baap ke qadmoñ meñ lā ke rakh

sab kor-chashm log haiñ hālat pe apnī ḳhush

ye 'aql kā charāġh yahāñ par bujhā ke rakh

ehsās-o-fikr kī na ho dhaḌkan 'azāb-e-jāñ

be-jān dil ko aisā khilaunā banā ke rakh

aa dekh haiñ qatīl-e-sitam-hā-e-dostāñ

tarkash meñ tiir saare tū apnī adā ke rakh

mā'lūm thā tujhe ki charāġhoñ meñ dam nahīñ

kis ne kahā thā sāmne in ko havā ke rakh

aankhon mein jitne chahe samundar bula ke rakh

KHak-e-zamin se ashk tu apne bacha ke rakh

de shakl koi miTTi ko dast-e-hunar-shanas

koshish ke chaak par abhi KHwahish chaDha ke rakh

nayab chahaton ka KHazana hai KHud wo zat

man ki hatheli chum ke us par kama ke rakh

mehnat se sab sameT tu duniya ka sim-o-zar

aur sin-rasida bap ke qadmon mein la ke rakh

sab kor-chashm log hain haalat pe apni KHush

ye 'aql ka charagh yahan par bujha ke rakh

ehsas-o-fikr ki na ho dhaDkan 'azab-e-jaan

be-jaan dil ko aisa khilauna bana ke rakh

aa dekh hain qatil-e-sitam-ha-e-dostan

tarkash mein tir sare tu apni ada ke rakh

ma'lum tha tujhe ki charaghon mein dam nahin

kis ne kaha tha samne in ko hawa ke rakh