aankhon mein kahin uske bhi tufan to nahin tha

āñkhoñ meñ kahīñ us ke bhī tūfāñ to nahīñ thā

vo mujh se judā ho ke pashemāñ to nahīñ thā

kyuuñ mujh se na kī us ne sar-e-bazm koī baat

maiñ sañg-e-malāmat se gurezāñ to nahīñ thā

haañ harf-e-tasallī ke liye thā maiñ pareshāñ

pahlū meñ mire dil thā kuhistāñ to nahīñ thā

kyuuñ rāsta dekhā kiyā us kā maiñ sar-e-shām

be-dard kā mujh se koī paimāñ to nahīñ thā

jalva thā tirā aag meñ har lahza huvaidā

varna mujhe jal marne kā armāñ to nahīñ thā

thā dil bhī kabhī shahr-e-tamannā se mumāsil

ye qarya hamesha se bayābāñ to nahīñ thā

tūfān-e-alam kyuuñ mujhe sāhil pe utārā

maiñ shor-e-talātum se hirāsāñ to nahīñ thā

rakkhā thā chhupā kar jise alfāz meñ maiñ ne

parde meñ suḳhan ke bhī vo uryāñ to nahīñ thā

kahte haiñ ki hai 'arsh' nigūñ paa.e nabī par

aisā vo koī sāhab-e-īmāñ to nahīñ thā

aankhon mein kahin us ke bhi tufan to nahin tha

wo mujh se juda ho ke pasheman to nahin tha

kyun mujh se na ki us ne sar-e-bazm koi baat

main sang-e-malamat se gurezan to nahin tha

han harf-e-tasalli ke liye tha main pareshan

pahlu mein mere dil tha kuhistan to nahin tha

kyun rasta dekha kiya us ka main sar-e-sham

be-dard ka mujh se koi paiman to nahin tha

jalwa tha tera aag mein har lahza huwaida

warna mujhe jal marne ka arman to nahin tha

tha dil bhi kabhi shahr-e-tamanna se mumasil

ye qarya hamesha se bayaban to nahin tha

tufan-e-alam kyun mujhe sahil pe utara

main shor-e-talatum se hirasan to nahin tha

rakkha tha chhupa kar jise alfaz mein main ne

parde mein suKHan ke bhi wo uryan to nahin tha

kahte hain ki hai 'arsh' nigun pae nabi par

aisa wo koi sahab-e-iman to nahin tha