آنکھوں میں کھبے جائے ہے تصویر لگے ہے

آنکھوں میں کھبے جائے ہے تصویر لگے ہے

اشعار سے جھلکے ہے جواں میرؔ لگے ہے

سو بار لکھا ہے اسے سو بار پڑھا ہے

پھر بھی وہ کوئی اجنبی تحریر لگے ہے

مجھ جیسا گنہ گار نوازا گیا کیسے

مجھ کو تو کسی اور کی تقدیر لگے ہے

آنکھوں میں اتر آتا ہے اک آئنہ چہرہ

مجھ کو وہ مرے خواب کی تعبیر لگے ہے

اک عمر خیالوں میں رکھا جس کو بسائے

کل پرس سے نکلی ہے تو دلگیر لگے ہے

اس شوخ دہن کے لب و لہجے کا فسوں ہے

برچھی کبھی بھالا جو کبھی تیر لگے ہے

غالبؔ کی قلمرو کا غزل نام ہے خسروؔ

مجھ کو تو سخن میرؔ کی جاگیر لگے ہے