aankhon mein khube jae hai taswir lage hai

āñkhoñ meñ khube jaa.e hai tasvīr lage hai

ash.ār se jhalke hai javāñ 'mīr' lage hai

sau baar likhā hai use sau baar paḌhā hai

phir bhī vo koī ajnabī tahrīr lage hai

mujh jaisā gunahgār navāzā gayā kaise

mujh ko to kisī aur kī taqdīr lage hai

āñkhoñ meñ utar aatā hai ik aa.ina chehra

mujh ko vo mire ḳhvāb kī ta.abīr lage hai

ik umr ḳhayāloñ meñ rakhā jis ko basā.e

kal purse se niklī hai to dil-gīr lage hai

us shoḳh-dahan ke lab-o-lahje kā fusūñ hai

barchhī kabhī bhālā jo kabhī tiir lage hai

'ġhālib' kī qalam-rau kā ġhazal naam hai 'ḳhusrav'

mujh ko to suḳhan 'mīr' kī jāgīr lage hai

aankhon mein khube jae hai taswir lage hai

ashaar se jhalke hai jawan 'mir' lage hai

sau bar likha hai use sau bar paDha hai

phir bhi wo koi ajnabi tahrir lage hai

mujh jaisa gunahgar nawaza gaya kaise

mujh ko to kisi aur ki taqdir lage hai

aankhon mein utar aata hai ek aaina chehra

mujh ko wo mere KHwab ki tabir lage hai

ek umr KHayalon mein rakha jis ko basae

kal purse se nikli hai to dil-gir lage hai

us shoKH-dahan ke lab-o-lahje ka fusun hai

barchhi kabhi bhaala jo kabhi tir lage hai

'ghaalib' ki qalam-rau ka ghazal nam hai 'KHusraw'

mujh ko to suKHan 'mir' ki jagir lage hai