aankhon mein KHwab si hain yaaden zara zara si

āñkhoñ meñ ḳhvāb sī haiñ yādeñ zarā zarā sī

din par jhukī huī haiñ rāteñ zarā zarā sī

mausam badal ga.e haiñ sab shahr-e-ārzū ke

kyā kar ga.iiñ qayāmat bāteñ zarā zarā sī

ye zindagī kī baazī bāzīgarī nahīñ hai

kyā khel kheltī haiñ māteñ zarā zarā sī

guzre haiñ kārvāñ jab shādāb manziloñ se

qadmoñ meñ rah ga.ī haiñ rāheñ zarā zarā sī

hai sāqī-e-ufuq par baaqī hisāb din kā

gulnār ho ga.ī haiñ shāmeñ zarā zarā sī

hotā nahīñ nazar ko andāza-e-numū bhī

phūloñ meñ dab ga.ī haiñ shāḳheñ zarā zarā sī

un ke lahū meñ utre kyā rang aabrū kā

jo zindagī se rāhat māñgeñ zarā zarā sī

sañbhlā nahīñ chaman se phir naġhma-e-bahārāñ

sar se nikal ga.ī haiñ tāneñ zarā zarā sī

shāyad 'samad' kisī ne dāman rakhā hai lau par

khulne lagīñ havā kī bāheñ zarā zarā sī

aankhon mein KHwab si hain yaaden zara zara si

din par jhuki hui hain raaten zara zara si

mausam badal gae hain sab shahr-e-arzu ke

kya kar gain qayamat baaten zara zara si

ye zindagi ki bazi bazigari nahin hai

kya khel khelti hain maten zara zara si

guzre hain karwan jab shadab manzilon se

qadmon mein rah gai hain rahen zara zara si

hai saqi-e-ufuq par baqi hisab din ka

gulnar ho gai hain shamen zara zara si

hota nahin nazar ko andaza-e-numu bhi

phulon mein dab gai hain shaKHen zara zara si

un ke lahu mein utre kya rang aabru ka

jo zindagi se rahat mangen zara zara si

sanbhla nahin chaman se phir naghma-e-bahaaran

sar se nikal gai hain tanen zara zara si

shayad 'samad' kisi ne daman rakha hai lau par

khulne lagin hawa ki bahen zara zara si