aankhon mein mauj mauj koi sochne laga

āñkhoñ meñ mauj mauj koī sochne lagā

paanī meñ be-sabāt nagar Dūbne lagā

ik shāḳh-e-rañg haat se mausam ke chhuT ga.ī

ḳhālī badan ragoñ meñ koī loTne lagā

hai apne darmiyān koī fasl-e-nāravā

dahlīz pe khaḌā meñ kise sochne lagā

vo rauzan-e-ḳhayāl, sadā, sā.egī samāñ

phir harf zahr zahr zabāñ gholne lagā

maiñ ek barg-e-ḳhushk kabhī kā asīr-e-gard

phir kaun Daal Daal mujhe Tāñkne lagā

maiñ boltā rahā to kisī ne nahīñ sunā

maiñ chup huā to saarā nagar gūñjne lagā

aankhon mein mauj mauj koi sochne laga

pani mein be-sabaat nagar Dubne laga

ek shaKH-e-rang hat se mausam ke chhuT gai

KHali badan ragon mein koi loTne laga

hai apne darmiyan koi fasl-e-narawa

dahliz pe khaDa mein kise sochne laga

wo rauzan-e-KHayal, sada, saegi saman

phir harf zahr zahr zaban gholne laga

main ek barg-e-KHushk kabhi ka asir-e-gard

phir kaun Dal Dal mujhe Tankne laga

main bolta raha to kisi ne nahin suna

main chup hua to sara nagar gunjne laga