آنکھوں میں میل جول کا نقشہ سمٹ گیا

آنکھوں میں میل جول کا نقشہ سمٹ گیا

دیکھا اسے تو برسوں کا رستہ سمٹ گیا

میرے قریب کوئی بھی اپنا نہیں رہا

وہ کیا گیا کہ ایک زمانہ سمٹ گیا

اس گھر کے موسموں کو پتا بھی نہ چل سکا

دیوار جب اٹھائی تو کیا کیا سمٹ گیا

الفاظ ڈھونڈتے ہی رہے طرز گفتگو

وہ حسن تھا کہ کوزے میں دریا سمٹ گیا

وہ دل نہیں رہے نہ رہی اب وہ دل لگی

ہر شخص اپنے آپ میں اتنا سمٹ گیا

اسباب بٹ گیا تھا بچھڑنے کے ساتھ ساتھ

کیسا بڑا مکان تھا کتنا سمٹ گیا

خرم علیؔ یہاں سے وہاں تک کا فاصلہ

بس دو قدم چلے تھے کہ رستہ سمٹ گیا