aankhon mein mel-jol ka naqsha simaT gaya

āñkhoñ meñ mel-jol kā naqsha simaT gayā

dekhā use to barsoñ kā rasta simaT gayā

mere qarīb koī bhī apnā nahīñ rahā

vo kyā gayā ki ek zamāna simaT gayā

is ghar ke mausamoñ ko patā bhī na chal sakā

dīvār jab uThā.ī to kyā kyā simaT gayā

alfāz DhūñDte hī rahe tarz-e-guftugū

vo husn thā ki kuuze meñ dariyā simaT gayā

vo dil nahīñ rahe na rahī ab vo dil-lagī

har shaḳhs apne aap meñ itnā simaT gayā

asbāb baT gayā thā bichhaḌne ke saath saath

kaisā baḌā makān thā kitnā simaT gayā

'ḳhurram-‘alī' yahāñ se vahāñ tak kā fāsla

bas do qadam chale the ki rasta simaT gayā

aankhon mein mel-jol ka naqsha simaT gaya

dekha use to barson ka rasta simaT gaya

mere qarib koi bhi apna nahin raha

wo kya gaya ki ek zamana simaT gaya

is ghar ke mausamon ko pata bhi na chal saka

diwar jab uThai to kya kya simaT gaya

alfaz DhunDte hi rahe tarz-e-guftugu

wo husn tha ki kuze mein dariya simaT gaya

wo dil nahin rahe na rahi ab wo dil-lagi

har shaKHs apne aap mein itna simaT gaya

asbab baT gaya tha bichhaDne ke sath sath

kaisa baDa makan tha kitna simaT gaya

'KHurram-‘ali' yahan se wahan tak ka fasla

bas do qadam chale the ki rasta simaT gaya