aankhon mein meri KHwab basar hone laga hai

āñkhoñ meñ mirī ḳhvāb basar hone lagā hai

shāyad tirā nīñdoñ se guzar hone lagā hai

juz tere sabhī se mujhe hone lagī vahshat

itnā tirī chāhat kā asar hone lagā hai

yuuñ dast-e-masīhā.ī rakhā zaḳhmoñ pe tū ne

har zaḳhm mirā rashk-e-qamar hone lagā hai

shāyad mire kamre meñ bhī ab raushnī aa.e

paidā mirī dīvār meñ dar hone lagā hai

talḳhī ye kahāñ kī tire lahje meñ dar aa.ī

har lafz tirā sīna-sipar hone lagā hai

vo aag lagā.ī hai tire hijr ne dil meñ

har lamha judā.ī kā sharar hone lagā hai

ab 'rāz' chhupā.e nahīñ chhuptī mirī vahshat

zāhir pe bhī bātin kā asar hone lagā hai

aankhon mein meri KHwab basar hone laga hai

shayad tera nindon se guzar hone laga hai

juz tere sabhi se mujhe hone lagi wahshat

itna teri chahat ka asar hone laga hai

yun dast-e-masihai rakha zaKHmon pe tu ne

har zaKHm mera rashk-e-qamar hone laga hai

shayad mere kamre mein bhi ab raushni aae

paida meri diwar mein dar hone laga hai

talKHi ye kahan ki tere lahje mein dar aai

har lafz tera sina-sipar hone laga hai

wo aag lagai hai tere hijr ne dil mein

har lamha judai ka sharar hone laga hai

ab 'raaz' chhupae nahin chhupti meri wahshat

zahir pe bhi baatin ka asar hone laga hai