آنکھوں میں قید ہے تری تصویر لکھنؤ

آنکھوں میں قید ہے تری تصویر لکھنؤ

ٹوٹی نہیں ہے قرب کی زنجیر لکھنؤ

کل رات میں نے خواب میں دیکھا تھا میرؔ کو

ہے یعنی میرے خواب کی تعبیر لکھنؤ

آنکھیں ترس گئیں ترے دیدار کے لئے

اس بار ہو گئی مجھے تاخیر لکھنؤ

دل میں امین آباد تو لب پر حسین آباد

کس طور سے کروں تری تفسیر لکھنؤ

علم و ادب جوان ہوئے تیری گود میں

دنیا میں عام ہے تری توقیر لکھنؤ

شاعر ادیب اور مفسر کی شکل میں

پھیلائی تو نے علم کی تنویر لکھنؤ

درکار ہے حقیر کو گہوارۂ ادب

منزل ہے لکھنؤ مری تقدیر لکھنؤ

دو نسبتیں ملی ہیں مجھے دونوں با شرف

بنیاد میری سرسی ہے تعمیر لکھنؤ

سینہ شگاف ہو گیا جہل و جہول کا

برسائے تو نے علم کے جب تیر لکھنؤ

محورؔ بنا ہوا ہے تو اہل زبان کا

اوصاف کیا کروں ترے تحریر لکھنؤ