aankhon mein qaid hai teri taswir lakhnau

āñkhoñ meñ qaid hai tirī tasvīr lakhna.ū

TuuTī nahīñ hai qurb kī zanjīr lakhna.ū

kal raat maiñ ne ḳhvāb meñ dekhā thā 'mīr' ko

hai ya.anī mere ḳhvāb kī ta.abīr lakhna.ū

āñkheñ taras ga.iiñ tire dīdār ke liye

is baar ho ga.ī mujhe tāḳhīr lakhna.ū

dil meñ amīnābād to lab par husain-ābād

kis taur se karūñ tirī tafsīr lakhna.ū

ilm-o-adab javān hue terī god meñ

duniyā meñ aam hai tirī tauqīr lakhna.ū

shā.ir adiib aur mufassir kī shakl meñ

phailā.ī tū ne ilm kī tanvīr lakhna.ū

darkār hai haqīr ko gahvāra-e-adab

manzil hai lakhna.ū mirī taqdīr lakhna.ū

do nisbateñ milī haiñ mujhe donoñ bā-sharaf

buniyād merī sirsī hai ta.amīr lakhna.ū

siina shigāf ho gayā jahl-o-juhūl kā

barsā.e tū ne ilm ke jab tiir lakhna.ū

‘mehvar’ banā huā hai tū ahl-e-zabān kā

ausāf kyā karūñ tire tahrīr lakhna.ū

aankhon mein qaid hai teri taswir lakhnau

TuTi nahin hai qurb ki zanjir lakhnau

kal raat main ne KHwab mein dekha tha 'mir' ko

hai yani mere KHwab ki tabir lakhnau

aankhen taras gain tere didar ke liye

is bar ho gai mujhe taKHir lakhnau

dil mein aminabaad to lab par husain-abaad

kis taur se karun teri tafsir lakhnau

ilm-o-adab jawan hue teri god mein

duniya mein aam hai teri tauqir lakhnau

shair adib aur mufassir ki shakl mein

phailai tu ne ilm ki tanwir lakhnau

darkar hai haqir ko gahwara-e-adab

manzil hai lakhnau meri taqdir lakhnau

do nisbaten mili hain mujhe donon ba-sharaf

buniyaad meri sirsi hai tamir lakhnau

sina shigaf ho gaya jahl-o-juhul ka

barsae tu ne ilm ke jab tir lakhnau

‘mehwar’ bana hua hai tu ahl-e-zaban ka

ausaf kya karun tere tahrir lakhnau