aankhon mein roz ban ke samundar udasiyan

āñkhoñ meñ roz ban ke samundar udāsiyāñ

kyoñ zabt āzmātī haiñ aksar udāsiyāñ

jaise koī sañbhāltā hai apne zevarāt

ham ko sañbhāltī haiñ yuuñ aa kar udāsiyāñ

ham chaah kar bhī ḳhush nahīñ rah paa.e ziist meñ

bachpan se haavī ho ga.iiñ ham par udāsiyāñ

insāñ ko mil rahīñ haiñ jahāñ-bhar kī ne.amateñ

hairat hai phir bhī pasrī haiñ ghar ghar udāsiyāñ

duniyā kī raunaqoñ se nahīñ hai koī gurez

par ham ko raas aa.iiñ haiñ aksar udāsiyāñ

ḳhushbū se kis kī merā ye kamrā mahak uThā

ya.anī ki ho ga.iiñ haiñ mo.attar udāsiyāñ

gar sun sake to sun le ḳhamoshī kī ye sadā

kuchh kah rahī haiñ kaan meñ aa kar udāsiyāñ

sone pe lag gayā hai suhāgā ye dekhiye

ik to ġham-e-hayāt hai us par udāsiyāñ

is shahr-e-dil meñ koī ḳhushī aa.e kyā majāl

kartī haiñ raaj 'sant' ke dil par udāsiyāñ

aankhon mein roz ban ke samundar udasiyan

kyon zabt aazmati hain aksar udasiyan

jaise koi sanbhaalta hai apne zewaraat

hum ko sanbhaalti hain yun aa kar udasiyan

hum chah kar bhi KHush nahin rah pae zist mein

bachpan se hawi ho gain hum par udasiyan

insan ko mil rahin hain jahan-bhar ki neamaten

hairat hai phir bhi pasri hain ghar ghar udasiyan

duniya ki raunaqon se nahin hai koi gurez

par hum ko ras aain hain aksar udasiyan

KHushbu se kis ki mera ye kamra mahak uTha

yani ki ho gain hain moattar udasiyan

gar sun sake to sun le KHamoshi ki ye sada

kuchh kah rahi hain kan mein aa kar udasiyan

sone pe lag gaya hai suhaga ye dekhiye

ek to gham-e-hayat hai us par udasiyan

is shahr-e-dil mein koi KHushi aae kya majal

karti hain raj 'sant' ke dil par udasiyan