aankhon mein teri did ke manzar liye hue

āñkhoñ meñ terī diid ke manzar liye hue

phirte haiñ sar pe boriyā bistar liye hue

pahlī nazar ne aap kī bismil kiyā hameñ

ham aaj tak vo choT haiñ dil par liye hue

kaise kahūñ kahāñ hai mohabbat kahāñ nahīñ

rag rag meñ dauḌtī phire nashtar liye hue

ai ārzū-e-dasht kahīñ to qayām kar

kyuuñ phir rahī hai ḳhvāboñ kā lashkar liye hue

kyā jaane kab kisī se bichhaḌnā paḌe yahāñ

ham jī rahe haiñ dil meñ yahī Dar liye hue

jin se sañbhal na paatā hai chūḌī kā bojh tak

vo phir rahe hai shahar meñ hunter liye hue

hālāñki ibtidā hai mere zauq-e-ishq kī

duniyā khaḌī hai haath meñ patthar liye hue

ik frame meñ jaḌe hue haiñ donoñ ek saath

maiñ sar jhukā.e aur vo ḳhanjar liye hue

ab dar-ba-dar yahāñ se vahāñ ghūmte haiñ ham

palkoñ pe kitne dard ke manzar liye hue

aankhon mein teri did ke manzar liye hue

phirte hain sar pe boriya bistar liye hue

pahli nazar ne aap ki bismil kiya hamein

hum aaj tak wo choT hain dil par liye hue

kaise kahun kahan hai mohabbat kahan nahin

rag rag mein dauDti phire nashtar liye hue

ai aarzu-e-dasht kahin to qayam kar

kyun phir rahi hai KHwabon ka lashkar liye hue

kya jaane kab kisi se bichhaDna paDe yahan

hum ji rahe hain dil mein yahi Dar liye hue

jin se sanbhal na pata hai chuDi ka bojh tak

wo phir rahe hai shahar mein hunter liye hue

haalanki ibtida hai mere zauq-e-ishq ki

duniya khaDi hai hath mein patthar liye hue

ek frame mein jaDe hue hain donon ek sath

main sar jhukae aur wo KHanjar liye hue

ab dar-ba-dar yahan se wahan ghumte hain hum

palkon pe kitne dard ke manzar liye hue