aankhon mein tez dhup ke neze gaDe rahe

āñkhoñ meñ tez dhuup ke neze gaḌe rahe

ham tere intizār meñ phir bhī khaḌe rahe

tum ruk ga.e pa sañg kā mela na kam huā

is kārvāñ ke saath musāfir baḌe rahe

mere badan pe sirf havā kā libās thā

terī qabā meñ chāñd sitāre jaḌe rahe

saa.e ko log pūjte aa.e haiñ der se

patte hamesha paañv meñ bikhre paḌe rahe

shāyad vo 'rām' merī tarah bad-nasīb the

jo log tere pyaar kī zid par aḌe rahe

aankhon mein tez dhup ke neze gaDe rahe

hum tere intizar mein phir bhi khaDe rahe

tum ruk gae pa sang ka mela na kam hua

is karwan ke sath musafir baDe rahe

mere badan pe sirf hawa ka libas tha

teri qaba mein chand sitare jaDe rahe

sae ko log pujte aae hain der se

patte hamesha panw mein bikhre paDe rahe

shayad wo 'ram' meri tarah bad-nasib the

jo log tere pyar ki zid par aDe rahe