آنکھوں سے اگر سلسلۂ خواب نہ ٹوٹے

آنکھوں سے اگر سلسلۂ خواب نہ ٹوٹے

پھر تو کسی عنواں دل بیتاب نہ ٹوٹے

اندھیر ہے میخانے کے آداب نہ ٹوٹے

دل ٹوٹ گئے جام مئے ناب نہ ٹوٹے

ہو جائے نہ اظہار کدورت کسی صورت

اے دوست یہ الفاظ کی محراب نہ ٹوٹے

ہر نشتر تفریق نے مرہم کا کیا کام

توڑے گئے لیکن مرے احباب نہ ٹوٹے

کچھ آبروئے صحن چمن کا بھی رہے پاس

اب شاخ سے کوئی گل شاداب نہ ٹوٹے

پھر گردش دوراں سے الجھنا نہیں مشکل

غربت میں جو پندار تب و تاب نہ ٹوٹے

گہرائیٔ دریا کا بھرم رہ گیا بسملؔ

اچھا ہی ہوا گوہر کم یاب نہ ٹوٹے