aankhon se baraste ashkon ki barsat pe rona aata hai

āñkhoñ se baraste ashkoñ kī barsāt pe ronā aatā hai

nādānī-e-ulfat kar baiThe is baat pe ronā aatā hai

har saañs hai ik talvār banī har nafs hai ġham kā paimāna

karte haiñ mohabbat jo un ko kāñToñ pe bhī sonā aatā hai

ab dil ko hai samjhānā mushkil jo TuuT gayā so TuuT gayā

kyā baat banegī hañsne se hañste haiñ to ronā aatā hai

baḳhshe haiñ tū ne laakh sitam ġham mujh ko diye haiñ terā karam

ham ko bhī ġhamoñ ke tīroñ ko siine meñ chubhonā aatā hai

bahte hue ashko ruk jaao armān ke dhāro tham jaao

dekho to tasavvur meñ mere sājan vo salonā aatā hai

aankhon se baraste ashkon ki barsat pe rona aata hai

nadani-e-ulfat kar baiThe is baat pe rona aata hai

har sans hai ek talwar bani har nafs hai gham ka paimana

karte hain mohabbat jo un ko kanTon pe bhi sona aata hai

ab dil ko hai samjhana mushkil jo TuT gaya so TuT gaya

kya baat banegi hansne se hanste hain to rona aata hai

baKHshe hain tu ne lakh sitam gham mujh ko diye hain tera karam

hum ko bhi ghamon ke tiron ko sine mein chubhona aata hai

bahte hue ashko ruk jao arman ke dhaaro tham jao

dekho to tasawwur mein mere sajan wo salona aata hai