aankhon se utar kar mere dil tak koi aae

āñkhoñ se utar kar mire dil tak koī aa.e

us dar pe bhī dene kabhī dastak koī aa.e

pahle to baḌe daam batātā thā vo dil ke

ab aas meñ baiThā hai ki gāhak koī aa.e

har baar maiñ duniyā ke bulāve pe gayā huuñ

is baar ye ḳhvāhish hai ki mujh tak koī aa.e

ab ek sā mausam to hamesha nahīñ rahtā

mumkin hai kisī roz achānak koī aa.e

ahbāb ke qadmoñ ko tarastī hai mirī shaam

khole hue baiThā huuñ maiñ baiThak koī aa.e

is dil ke makāñ kā maiñ 'hasan' pahlā makīñ huuñ

aatā hai mire ba.ad to be-shak koī aa.e

aankhon se utar kar mere dil tak koi aae

us dar pe bhi dene kabhi dastak koi aae

pahle to baDe dam batata tha wo dil ke

ab aas mein baiTha hai ki gahak koi aae

har bar main duniya ke bulawe pe gaya hun

is bar ye KHwahish hai ki mujh tak koi aae

ab ek sa mausam to hamesha nahin rahta

mumkin hai kisi roz achanak koi aae

ahbab ke qadmon ko tarasti hai meri sham

khole hue baiTha hun main baiThak koi aae

is dil ke makan ka main 'hasan' pahla makin hun

aata hai mere baad to be-shak koi aae