aansuon ka ek halqa khinch kar

āñsuoñ kā ek halqa khīñch kar

but banā baiThā huuñ sadma khīñch kar

ek kar Daalā hai sab māzī-o-hāl

vaqt kī Dorī ko thoḌā khīñch kar

pyaas ko bahlā rahā huuñ der se

ret par tasvīr-e-dariyā khīñch kar

multavī karte rahe ham maut ko

ik zarā sāñsoñ ko ulTā khīñch kar

jald le jā yaar mustaqbil mire

haal se saarā guzishta khīñch kar

band kar detā huuñ miTTī ke kivāḌ

ik zarā sā āb-e-tāza khīñch kar

lā mirī pahchān vāpas kar mujhe

varna dūñgā ḳhālī chehra khīñch kar

maiñ bhī miTTī kī tarah mazbūt huuñ

dekh le saarā zamāna khīñch kar

āḳhir-e-kār apnī āñkheñ band kiiñ

ek sard āh-e-tamāsha khīñch kar

'farhat-ehsās' ek maqnātīs hai

le gayā hai jaane kyā kyā khīñch kar

aansuon ka ek halqa khinch kar

but bana baiTha hun sadma khinch kar

ek kar Dala hai sab mazi-o-haal

waqt ki Dori ko thoDa khinch kar

pyas ko bahla raha hun der se

ret par taswir-e-dariya khinch kar

multawi karte rahe hum maut ko

ek zara sanson ko ulTa khinch kar

jald le ja yar mustaqbil mere

haal se sara guzishta khinch kar

band kar deta hun miTTi ke kiwaD

ek zara sa aab-e-taza khinch kar

la meri pahchan wapas kar mujhe

warna dunga KHali chehra khinch kar

main bhi miTTi ki tarah mazbut hun

dekh le sara zamana khinch kar

aaKHir-e-kar apni aankhen band kin

ek sard aah-e-tamasha khinch kar

'farhat-ehsas' ek maqnatis hai

le gaya hai jaane kya kya khinch kar