aansuon se dil ke in daghon ko dho leta hun main

āñsuoñ se dil ke in dāġhoñ ko dho letā huuñ maiñ

dard jab had se guzar jaatā hai ro letā huuñ maiñ

jab satātī hai kisī kī yaad tanhā.ī ke vaqt

āñsuoñ ke haar palkoñ se piro letā huuñ maiñ

shiddat-e-ehsās-e-ġham se jab bhī ghabrātā hai dil

āñsuoñ meñ apnī aahoñ ko Dubo letā huuñ maiñ

dard-e-ulfat dard-e-duniyā aur ye nanhā sā dil

ek kuuze meñ samundar ko samo letā huuñ maiñ

vahshateñ vīrāniyāñ jis dam satātī haiñ mujhe

yaad ke takiye pe sar rakh kar ke so letā huuñ maiñ

vahshat-e-dil kā ye aalam hai ki dushman ho yā dost

jo bhī mil jaatā hai us ke saath ho letā huuñ maiñ

haa.e vo lamhe aziyyat-kosh 'hairat' kyā kahūñ

jab ḳhamoshī meñ zabāñ hote haiñ ro letā huuñ maiñ

aansuon se dil ke in daghon ko dho leta hun main

dard jab had se guzar jata hai ro leta hun main

jab satati hai kisi ki yaad tanhai ke waqt

aansuon ke haar palkon se piro leta hun main

shiddat-e-ehsas-e-gham se jab bhi ghabraata hai dil

aansuon mein apni aahon ko Dubo leta hun main

dard-e-ulfat dard-e-duniya aur ye nanha sa dil

ek kuze mein samundar ko samo leta hun main

wahshaten viraniyan jis dam satati hain mujhe

yaad ke takiye pe sar rakh kar ke so leta hun main

wahshat-e-dil ka ye aalam hai ki dushman ho ya dost

jo bhi mil jata hai us ke sath ho leta hun main

hae wo lamhe aziyyat-kosh 'hairat' kya kahun

jab KHamoshi mein zaban hote hain ro leta hun main