aansu ki tarah ponchh ke phenka gaya hun main

aañsū kī tarah poñchh ke pheñkā gayā huuñ maiñ

taarā huuñ aur zamīñ pe girāyā gayā huuñ maiñ

qurbān-gāh-e-ġham pe chaḌhāne ke vāste

bachpan meñ kitne pyaar se paalā gayā huuñ maiñ

tābish-gureziyoñ ko majāl-e-nazar kahāñ

chashma lagā ke dhuup kā dekhā gayā huuñ maiñ

go mā-varā-e-vaqt bhī hai mujh meñ ek chiiz

mīzān-e-sub.h-o-shām meñ taulā gayā huuñ maiñ

dam le ke lauT jā.ūñgā o mezbāñ zamīñ

qāsid banā ke duur se bhejā gayā huuñ maiñ

ai sākinān-e-shahr-e-ḳhamoshān-e-zindagī

paiġhām-e-hashr de ke utārā gayā huuñ maiñ

manzil kī qadr hotī hai āvārgī ke ba.ad

jannat se is liye bhī nikālā gayā huuñ maiñ

'kausar' libās-e-qahr meñ utrī haiñ rahmateñ

Thokar lagā ke raah pe laayā gayā huuñ maiñ

aansu ki tarah ponchh ke phenka gaya hun main

tara hun aur zamin pe giraya gaya hun main

qurban-gah-e-gham pe chaDhane ke waste

bachpan mein kitne pyar se pala gaya hun main

tabish-gureziyon ko majal-e-nazar kahan

chashma laga ke dhup ka dekha gaya hun main

go ma-wara-e-waqt bhi hai mujh mein ek chiz

mizan-e-subh-o-sham mein taula gaya hun main

dam le ke lauT jaunga o mezban zamin

qasid bana ke dur se bheja gaya hun main

ai sakinan-e-shahr-e-KHamoshan-e-zindagi

paigham-e-hashr de ke utara gaya hun main

manzil ki qadr hoti hai aawargi ke baad

jannat se is liye bhi nikala gaya hun main

'kausar' libas-e-qahr mein utri hain rahmaten

Thokar laga ke rah pe laya gaya hun main