aansu ko apne dida-e-tar se nikalna

aañsū ko apne dīda-e-tar se nikālnā

lagtā hai mehmān ko ghar se nikālnā

sūkhe hue shajar meñ lahhū to nahiñ hai ḳhushk

koñpal koī numū kī shajar se nikālnā

is yaḳh-zada fazā meñ gar uḌne kā qasd hai

be-his rutoñ kī barf ko par se nikālnā

jis sub.h ke jilau meñ shaboñ kā hujūm ho

kirnoñ ko aise dām-e-sahar se nikālnā

jis se shab-e-hayāt kā sannāTā TuuT jaa.e

āvāz aisī sāz-e-hunar se nikālnā

sab kā nahīñ ye ahl-e-basīrat kā kaam hai

gahrī ḳhabar bhī sat.hī ḳhabar se nikālnā

rasta kaThin ho laakh na honā 'hazīñ' malūl

pahlū ḳhushī kā ranj-e-safar se nikālnā

aansu ko apne dida-e-tar se nikalna

lagta hai mehman ko ghar se nikalna

sukhe hue shajar mein lahhu to nahin hai KHushk

konpal koi numu ki shajar se nikalna

is yaKH-zada faza mein gar uDne ka qasd hai

be-his ruton ki barf ko par se nikalna

jis subh ke jilau mein shabon ka hujum ho

kirnon ko aise dam-e-sahar se nikalna

jis se shab-e-hayat ka sannaTa TuT jae

aawaz aisi saz-e-hunar se nikalna

sab ka nahin ye ahl-e-basirat ka kaam hai

gahri KHabar bhi sathi KHabar se nikalna

rasta kaThin ho lakh na hona 'hazin' malul

pahlu KHushi ka ranj-e-safar se nikalna