aansu meri aankhon se Tapak jae to kya ho

aañsū mirī āñkhoñ se Tapak jaa.e to kyā ho

tūfāñ koī phir aa ke dhamak jaa.e to kyā ho

bas is liye rahbar pe nahīñ mujh ko bharosa

buddhū hai vo ḳhud raah bhaTak jaa.e to kyā ho

achchhī ye tasavvur kī nahīñ dast-darāzī

añgiyā kahīñ is but kī masak jaa.e to kyā ho

vaa.iz ye gulistāñ ye bahāreñ ye ghaTā.eñ

sāġhar koī aise meñ khanak jaa.e to kyā ho

ye chāh-kanī mere liye bānī-e-bedād

tū ḳhud isī koiyāñ meñ luḌhak jaa.e to kyā ho

ġhurbat se mirī sub.h o masā khelne vaale

terā bhī divālā jo khisak jaa.e to kyā ho

ye bār-e-amānat tū uThātā to hai lekin

nāzuk hai kamar terī lachak jaa.e to kyā ho

ruk ruk ke zarā haath baḌhā ḳhvān-e-karam par

luqma koī jaldī meñ aTak jaa.e to kyā ho

maiñ qaid huuñ par āh-e-rasā qaid nahīñ hai

vo jail kī dīvār taḌak jaa.e to kyā ho

ai sāqi-e-gulfām zarā soch le ye bhī

kulhaḌ tirī hastī kā chhalak jaa.e to kyā ho

jallād se ai 'shauq' maiñ ye pūchh rahā huuñ

tū bhī yūñhī phāñsī pe laTak jaa.e to kyā ho

aansu meri aankhon se Tapak jae to kya ho

tufan koi phir aa ke dhamak jae to kya ho

bas is liye rahbar pe nahin mujh ko bharosa

buddhu hai wo KHud rah bhaTak jae to kya ho

achchhi ye tasawwur ki nahin dast-daraazi

angiya kahin is but ki masak jae to kya ho

waiz ye gulistan ye bahaaren ye ghaTaen

saghar koi aise mein khanak jae to kya ho

ye chah-kani mere liye bani-e-bedad

tu KHud isi koiyan mein luDhak jae to kya ho

ghurbat se meri subh o masa khelne wale

tera bhi diwala jo khisak jae to kya ho

ye bar-e-amanat tu uThata to hai lekin

nazuk hai kamar teri lachak jae to kya ho

ruk ruk ke zara hath baDha KHwan-e-karam par

luqma koi jaldi mein aTak jae to kya ho

main qaid hun par aah-e-rasa qaid nahin hai

wo jail ki diwar taDak jae to kya ho

ai saqi-e-gulfam zara soch le ye bhi

kulhaD teri hasti ka chhalak jae to kya ho

jallad se ai 'shauq' main ye puchh raha hun

tu bhi yunhi phansi pe laTak jae to kya ho