aansuon ke sail mein yun putliyan chalne lagin

āñsuoñ ke sail meñ yuuñ putliyāñ chalne lagīñ

jaise āñkhoñ kī nadī meñ kashtiyāñ chalne lagīñ

un se mil kar dil ko mere aaj kuchh aisā lagā

jism ke phūloñ pe jaise titliyāñ chalne lagīñ

merī āñkhoñ kā har ik manzar hai yuuñ ḳhāna-ba-dosh

shab ke sannāTe meñ jaise bastiyāñ chalne lagīñ

chhin ga.e sab ḳhvāb mere niiñd kī āġhosh se

jab lagā mujh ko ki ghar kī khiḌkiyāñ chalne lagīñ

un kī zulfoñ kī ghaTā.eñ ghir ke aa.iiñ aur bas

ḳhāna-e-dil meñ hamāre bijliyāñ chalne lagīñ

ḳhvāb meñ dekhā hai maiñ ne aaj phir kal kī tarah

dasht kī sūkhī nadī meñ machhliyāñ chalne lagīñ

jism ko mere muqayyad kar liyā zālim ne jab

mere zehn-e-be-rasā meñ beḌiyāñ chalne lagīñ

apne kānoñ par yaqīñ aaya mujhe kal raat ko

jab havā ke dosh par se sīTiyāñ chalne lagīñ

aansuon ke sail mein yun putliyan chalne lagin

jaise aankhon ki nadi mein kashtiyan chalne lagin

un se mil kar dil ko mere aaj kuchh aisa laga

jism ke phulon pe jaise titliyan chalne lagin

meri aankhon ka har ek manzar hai yun KHana-ba-dosh

shab ke sannaTe mein jaise bastiyan chalne lagin

chhin gae sab KHwab mere nind ki aaghosh se

jab laga mujh ko ki ghar ki khiDkiyan chalne lagin

un ki zulfon ki ghaTaen ghir ke aain aur bas

KHana-e-dil mein hamare bijliyan chalne lagin

KHwab mein dekha hai main ne aaj phir kal ki tarah

dasht ki sukhi nadi mein machhliyan chalne lagin

jism ko mere muqayyad kar liya zalim ne jab

mere zehn-e-be-rasa mein beDiyan chalne lagin

apne kanon par yaqin aaya mujhe kal raat ko

jab hawa ke dosh par se siTiyan chalne lagin