aao ki abhi chhanw sitaron ki ghani hai

aao ki abhī chhāñv sitāroñ kī ghanī hai

phir shaam talak dasht-e-ġharīb-ul-vatanī hai

kuchh bhī ho magar husn kī fitrat meñ abhī tak

pābandī-e-rasm-o-rah-e-ḳhātir-shikanī hai

mat pūchh ki kyā rañg hai zabt-e-ġham-e-dil meñ

har ashk jo piitā huuñ vo hiire kī kanī hai

shā.ir ke taḳhayyul se charāġhoñ kī lavoñ tak

har chiiz tirī bazm meñ tasvīr banī hai

tum jis ko bahut samjhe to ik buuñd lahū kī

pūchho mire dāman se aqīq-e-yamanī hai

ma.alūm huā jab ki rahā kuchh bhī na dil meñ

bas ek nazar qīmat-e-duniyā-e-danī hai

iblīs ho suqrāt ho sarmad ho ki mansūr

ḳhud-āgahī har shakl meñ gardan-zadanī hai

maqsūd na bulbul hai na tuutī hai na qumrī

matlab to chaman vāloñ kā navak-faganī hai

āsā.ish-e-getī hai sazā be-hunarī kī

āzurdagī-e-dil sila-e-ḳhush-suḳhanī hai

kin phuul fazāoñ kī tavaqqo meñ paḌe ho

hoshyār ki yaañ zauq-e-sabā sho.ala-zanī hai

aao chaleñ us anjuman-e-bul-havasāñ se

ātish-nafasaī hai na jahāñ gul-badanī hai

'shohrat' se kabhī jaan talab kar ke to dekho

har-chand tahī-dast hai par dil kā ġhanī hai

aao ki abhi chhanw sitaron ki ghani hai

phir sham talak dasht-e-gharib-ul-watani hai

kuchh bhi ho magar husn ki fitrat mein abhi tak

pabandi-e-rasm-o-rah-e-KHatir-shikani hai

mat puchh ki kya rang hai zabt-e-gham-e-dil mein

har ashk jo pita hun wo hire ki kani hai

shair ke taKHayyul se charaghon ki lawon tak

har chiz teri bazm mein taswir bani hai

tum jis ko bahut samjhe to ek bund lahu ki

puchho mere daman se aqiq-e-yamani hai

malum hua jab ki raha kuchh bhi na dil mein

bas ek nazar qimat-e-duniya-e-dani hai

iblis ho suqraat ho sarmad ho ki mansur

KHud-agahi har shakl mein gardan-zadani hai

maqsud na bulbul hai na tuti hai na qumri

matlab to chaman walon ka nawak-fagani hai

aasaish-e-geti hai saza be-hunari ki

aazurdagi-e-dil sila-e-KHush-suKHani hai

kin phul fazaon ki tawaqqo mein paDe ho

hoshyar ki yan zauq-e-saba shoala-zani hai

aao chalen us anjuman-e-bul-hawasan se

aatish-nafasai hai na jahan gul-badani hai

'shohrat' se kabhi jaan talab kar ke to dekho

har-chand tahi-dast hai par dil ka ghani hai