aao kuchh shaghl karen baiThe hain uryan itne

aao kuchh shaġhl kareñ baiThe haiñ uryāñ itne

phāḌeñ siina hī go haath aa.e garebāñ itne

aah koī jo use aan ke samjhātā ho

dekhte haiñ khaḌe hindū o musalmāñ itne

sach kah ai bād-e-sabā hai kisī gul par ye bahār

tū ne dekhe haiñ zamāne ke gulistāñ itne

shor mahshar kā rahe kyuuñ na tire kūche meñ

jis jagah hoveñ ikaTThe dil-e-nālāñ itne

ham se vāmāñdoñ ko allāh nibāhe to nibheñ

tan so ye ḳhasta o darpesh bayābāñ itne

dam bhī kuchh chiiz hai jab chuuk gayā baat tamām

kaun sī ziist pe tū kartā hai sāmāñ itne

tujh ko 'qā.em' rakhe allāh bahut sā ai amiir

mujtam.a saa.e meñ haiñ jis ke suḳhan-dāñ itne

aao kuchh shaghl karen baiThe hain uryan itne

phaDen sina hi go hath aae gareban itne

aah koi jo use aan ke samjhata ho

dekhte hain khaDe hindu o musalman itne

sach kah ai baad-e-saba hai kisi gul par ye bahaar

tu ne dekhe hain zamane ke gulistan itne

shor mahshar ka rahe kyun na tere kuche mein

jis jagah howen ikaTThe dil-e-nalan itne

hum se wamandon ko allah nibahe to nibhen

tan so ye KHasta o darpesh bayaban itne

dam bhi kuchh chiz hai jab chuk gaya baat tamam

kaun si zist pe tu karta hai saman itne

tujh ko 'qaem' rakhe allah bahut sa ai amir

mujtama sae mein hain jis ke suKHan-dan itne