aao na mujh mein utar jao ghazal hone tak

aao nā mujh meñ utar jaao ġhazal hone tak

tum zarā aur nikhar jaao ġhazal hone tak

merī ḳhātir hī Thahar jaao ġhazal hone tak

aarzū hai ki na ghar jaao ġhazal hone tak

tum agar chāho to har sher shagufta ho jaa.e

bas mire dil meñ utar jaao ġhazal hone tak

chāñd ban kar mirī shohrat meñ ujālā kar do

raushnī ban ke bikhar jaao ġhazal hone tak

merī jānib se ijāzat hai chale jaao magar

dil ba-zid hai to Thahar jaao ġhazal hone tak

merī āñkhoñ se mire dil meñ pahuñch kar tum bhī

dil kī dhaḌkan meñ utar jaao ġhazal hone tak

kaash sab rañg ke huuñ aaj mire sab ash.ār

rañg har lafz meñ bhar jaao ġhazal hone tak

mere fan se tumheñ be-laus mohabbat hai agar

merī rag rag meñ utar jaao ġhazal hone tak

sher kahne kā salīqa bhī sikhā do mujh ko

aaj ye kaam bhī kar jaao ġhazal hone tak

shā.irī meñ jo hai rutbe kī tamannā 'rūmī'

fikr kī tah meñ utar jaao ġhazal hone tak

aao na mujh mein utar jao ghazal hone tak

tum zara aur nikhar jao ghazal hone tak

meri KHatir hi Thahar jao ghazal hone tak

aarzu hai ki na ghar jao ghazal hone tak

tum agar chaho to har sher shagufta ho jae

bas mere dil mein utar jao ghazal hone tak

chand ban kar meri shohrat mein ujala kar do

raushni ban ke bikhar jao ghazal hone tak

meri jaanib se ijazat hai chale jao magar

dil ba-zid hai to Thahar jao ghazal hone tak

meri aankhon se mere dil mein pahunch kar tum bhi

dil ki dhaDkan mein utar jao ghazal hone tak

kash sab rang ke hun aaj mere sab ashaar

rang har lafz mein bhar jao ghazal hone tak

mere fan se tumhein be-laus mohabbat hai agar

meri rag rag mein utar jao ghazal hone tak

sher kahne ka saliqa bhi sikha do mujh ko

aaj ye kaam bhi kar jao ghazal hone tak

shairi mein jo hai rutbe ki tamanna 'rumi'

fikr ki tah mein utar jao ghazal hone tak