aao phir mil jaen sab baaten purani chhoD kar

aao phir mil jaa.eñ sab bāteñ purānī chhoḌ kar

jā nahīñ sakte kahīñ dariyā ravānī chhoḌ kar

vo mire kaase meñ yādeñ chhoḌ kar yuuñ chal diyā

jis tarah alfāz jaate hoñ ma.ānī chhoḌ kar

tum mire dil se ga.e ho to nigāhoñ se bhī jaao

phir vahāñ Thahrā nahīñ karte nishānī chhoḌ kar

ab sunā hai aam shahrī kī tarah phirte ho tum

kyā milā hai mere dil kī hukmarānī chhoḌ kar

bas abhī tūfān-e-ġham kā tazkira aayā hī thā

sab gharoñ ko chal diye merī kahānī chhoḌ kar

is tarah mere qabīle meñ kabhī hotā nahīñ

kaise jā.ūñ tere ġham kī mezbānī chhoḌ kar

ye kalām-ul-lāh kab hai jo sadā baaqī rahe

dār-e-fānī se chale haiñ naqsh-e-fānī chhoḌ kar

aao phir mil jaen sab baaten purani chhoD kar

ja nahin sakte kahin dariya rawani chhoD kar

wo mere kase mein yaaden chhoD kar yun chal diya

jis tarah alfaz jate hon maani chhoD kar

tum mere dil se gae ho to nigahon se bhi jao

phir wahan Thahra nahin karte nishani chhoD kar

ab suna hai aam shahri ki tarah phirte ho tum

kya mila hai mere dil ki hukmarani chhoD kar

bas abhi tufan-e-gham ka tazkira aaya hi tha

sab gharon ko chal diye meri kahani chhoD kar

is tarah mere qabile mein kabhi hota nahin

kaise jaun tere gham ki mezbani chhoD kar

ye kalam-ul-lah kab hai jo sada baqi rahe

dar-e-fani se chale hain naqsh-e-fani chhoD kar