aao to bahal jae mera dil-e-diwana

aao to bahal jaa.e merā dil-e-dīvāna

gulshan hai bahārāñ hai labrez hai paimāna

jab ġhaur se sunte haiñ vo ishq kā afsāna

kis tarah machaltā hai merā dil-e-dīvāna

aañkh uThne lagī terī aur sharm zarā kam ho

shīshe meñ dikhā dūñgā phir tujh ko parī-ḳhāna

is shoḳh-nigāhī kī tārīf nahīñ mumkin

laḌtī hai nazar jis se ban jaatī hai begāna

ye abr shafaq-āgūñ ye sard havā saaqī

ik aur surāhī lā ik aur de paimāna

āshiq kā abhī rutba samjhā hī nahīñ tū ne

dekhne meñ hai dīvāna matlab kā hai farzāna

vo bazm meñ aa baiThe ab sham.a bujhā diije

marne ko vo aatā hai parvāne pe parvāna

'shañkar' kī ġhazal sun kar tārīf karo dil se

sab sāñche meñ Dhalte haiñ ye qaul-e-hakīmāna

aao to bahal jae mera dil-e-diwana

gulshan hai bahaaran hai labrez hai paimana

jab ghaur se sunte hain wo ishq ka afsana

kis tarah machalta hai mera dil-e-diwana

aankh uThne lagi teri aur sharm zara kam ho

shishe mein dikha dunga phir tujh ko pari-KHana

is shoKH-nigahi ki tarif nahin mumkin

laDti hai nazar jis se ban jati hai begana

ye abr shafaq-agun ye sard hawa saqi

ek aur surahi la ek aur de paimana

aashiq ka abhi rutba samjha hi nahin tu ne

dekhne mein hai diwana matlab ka hai farzana

wo bazm mein aa baiThe ab shama bujha dije

marne ko wo aata hai parwane pe parwana

'shankar' ki ghazal sun kar tarif karo dil se

sab sanche mein Dhalte hain ye qaul-e-hakimana