aap-biti ho wo ya koi kahani kahiye

āp-bītī ho vo yā koī kahānī kahiye

baat jo kahiye vo urdu kī zabānī kahiye

koī dildār to miltā hī nahīñ hai kis se

dard-e-dil dard-e-jigar soz-e-nihānī kahiye

aadmī aadmī ke ḳhuun kā pyāsā hai yahāñ

āj-kal ḳhuun ko bahtā huā paanī kahiye

desh kī saarī zabānoñ kī zabāñ hai urdu

is ko yak-jehtī-e-qaumī kī nishānī kahiye

garm bāzār hai ab nafrat o be-zārī kā

jins-e-tahzīb-o-sharāfat kī girānī kahiye

zulf-o-ruḳhsār-o-ḳhat-o-ḳhāl-o-lab-e-jānāñ kī

baat kahiye to ġhazal hī kī zabānī kahiye

vaqt kahtā hai ki nafrat ke parastāroñ se

ulfat-o-mahr-o-mohabbat kī kahānī kahiye

chāñd se baḌh ke vatan kī ye zamīñ hai us ko

ḳhushnumā kahiye hasīñ kahiye suhānī kahiye

sher ban kar jo nikalte haiñ mire dil se 'nazar'

apne jazbāt ġhazal hī kī zabānī kahiye

aap-biti ho wo ya koi kahani kahiye

baat jo kahiye wo urdu ki zabani kahiye

koi dildar to milta hi nahin hai kis se

dard-e-dil dard-e-jigar soz-e-nihani kahiye

aadmi aadmi ke KHun ka pyasa hai yahan

aaj-kal KHun ko bahta hua pani kahiye

desh ki sari zabanon ki zaban hai urdu

is ko yak-jehti-e-qaumi ki nishani kahiye

garm bazar hai ab nafrat o be-zari ka

jins-e-tahzib-o-sharafat ki girani kahiye

zulf-o-ruKHsar-o-KHat-o-KHal-o-lab-e-jaanan ki

baat kahiye to ghazal hi ki zabani kahiye

waqt kahta hai ki nafrat ke parastaron se

ulfat-o-mahr-o-mohabbat ki kahani kahiye

chand se baDh ke watan ki ye zamin hai us ko

KHushnuma kahiye hasin kahiye suhani kahiye

sher ban kar jo nikalte hain mere dil se 'nazar'

apne jazbaat ghazal hi ki zabani kahiye