آپ بیتی ہو وہ یا کوئی کہانی کہئے

آپ بیتی ہو وہ یا کوئی کہانی کہئے

بات جو کہئے وہ اردو کی زبانی کہئے

کوئی دل دار تو ملتا ہی نہیں ہے کس سے

درد دل درد جگر سوز نہانی کہئے

آدمی آدمی کے خون کا پیاسا ہے یہاں

آج کل خون کو بہتا ہوا پانی کہئے

دیش کی ساری زبانوں کی زباں ہے اردو

اس کو یکجہتیٔ قومی کی نشانی کہئے

گرم بازار ہے اب نفرت و بے زاری کا

جنس تہذیب و شرافت کی گرانی کہئے

زلف و رخسار و خط و خال و لب جاناں کی

بات کہئے تو غزل ہی کی زبانی کہئے

وقت کہتا ہے کہ نفرت کے پرستاروں سے

الفت و مہر و محبت کی کہانی کہئے

چاند سے بڑھ کے وطن کی یہ زمیں ہے اس کو

خوش نما کہئے حسیں کہئے سہانی کہئے

شعر بن کر جو نکلتے ہیں مرے دل سے نظرؔ

اپنے جذبات غزل ہی کی زبانی کہئے