آپ دیکھیں نہ چراغ سر محفل کی طرح

آپ دیکھیں نہ چراغ سر محفل کی طرح

آپ کا دل بھی نہ ہو جائے مرے دل کی طرح

کبھی فرصت نہیں دیتے ہیں ہجوم افکار

دائرہ غم کا ہے اب طوق سلاسل کی طرح

ان کی قربت سے بھی کچھ فیض نہ پایا ہم نے

ہم پیاسے ہی رہے بحر کے ساحل کی طرح

جھلملاتی ہوئی بجھنے لگی اب شمع حیات

زندگی بھی ہے چراغ سر محفل کی طرح

دوست احباب نے بھی حال نہ پوچھا آ کر

ہم تڑپتے ہی رہے طائر بسمل کی طرح

در و دیوار ترستے ہیں سکوں کی خاطر

اب وطن بھی ہے ذکیؔ کوچۂ قاتل کی طرح