aap dil mein mere qiyam karen

aap dil meñ mire qiyām kareñ

ghar bigaḌtā hai intizām kareñ

ā.īye mil ke aise kaam kareñ

aur ūñchā vatan kā naam kareñ

un kī qurbat kī hai mujhe ummīd

jo mujhe duur se salām kareñ

vā'da-e-vasl to kareñ ik baar

aap phir laakh sub.h-o-shām kareñ

baḳht shāyad ba-auj-e-bām aa.e

ek sajda to zer-e-bām kareñ

yā kareñ merī aarzū puurī

yā mirā kaam hī tamām kareñ

us kī āñkhoñ meñ niiñd kyā mā'nā

jis kī āñkhoñ meñ vo qiyām kareñ

ḳhud-ba-ḳhud jins-e-zarf hogī 'aam

faiz-e-mai-ḳhāna aap 'aam kareñ

maiñ hī ghar meñ jo raushnī kar luuñ

phir añdhere kahāñ qiyām kareñ

ab samā'at kā zauq hai kis ko

dil kā qissa na kyoñ tamām kareñ

ḳhud havas se hai pā-ba-jaulāñ 'ishq

aap nāhaq na fikr-e-dām kareñ

bhuul jaate haiñ bolnā yaksar

aap se jab bhī ham-kalām kareñ

ab ye qissa tamām karte haiñ

tā-ba-kai sa'ī-e-nā-tamām kareñ

ham kahāñ aur kahāñ tumhārā vasl

ham aur aisā ḳhayāl-e-ḳhām kareñ

ai 'amar' aa.e haiñ vo mere ghar

kaash shab phir yahāñ qiyām kareñ

aap dil mein mere qiyam karen

ghar bigaDta hai intizam karen

aaiye mil ke aise kaam karen

aur uncha watan ka nam karen

un ki qurbat ki hai mujhe ummid

jo mujhe dur se salam karen

wa'da-e-wasl to karen ek bar

aap phir lakh subh-o-sham karen

baKHt shayad ba-auj-e-baam aae

ek sajda to zer-e-baam karen

ya karen meri aarzu puri

ya mera kaam hi tamam karen

us ki aankhon mein nind kya ma'na

jis ki aankhon mein wo qiyam karen

KHud-ba-KHud jins-e-zarf hogi 'am

faiz-e-mai-KHana aap 'am karen

main hi ghar mein jo raushni kar lun

phir andhere kahan qiyam karen

ab sama'at ka zauq hai kis ko

dil ka qissa na kyon tamam karen

KHud hawas se hai pa-ba-jaulan 'ishq

aap nahaq na fikr-e-dam karen

bhul jate hain bolna yaksar

aap se jab bhi ham-kalam karen

ab ye qissa tamam karte hain

ta-ba-kai sa'i-e-na-tamam karen

hum kahan aur kahan tumhaara wasl

hum aur aisa KHayal-e-KHam karen

ai 'amar' aae hain wo mere ghar

kash shab phir yahan qiyam karen