aap hain main hun mohabbat ki Dagar hai samne

aap haiñ maiñ huuñ mohabbat kī Dagar hai sāmne

sochiye mat ḳhūbsūrat sā safar hai sāmne

aap kī āñkhoñ kā manzar dekh kar lagtā hai yuuñ

jis se maiñ raushan huā huuñ vo qamar hai sāmne

saayā ban ke saath hai vo fāsla phir bhī lage

aisī qurbat meñ bhī duurī kā asar hai sāmne

kyā karūñ us moḌ par ye mas.ala phir aa gayā

ik taraf dar hai ḳhudā kā terā ghar hai sāmne

zabt aisā thā ki patthar ho gayā ye dil mirā

chashm-e-tar huuñ kyūñki merā ham-safar hai sāmne

baat hotī to ye 'ālam kyā se kyā hotā magar

vo bhī chup hai maiñ bhī chup huuñ aur nazar hai sāmne

zor-e-bāzū āzmānā hai agar ab aap ko

haath meñ patthar uThā lo merā sar hai sāmne

jhurriyoñ meñ gum huī bachpan kī sab mā'sūmiyat

'umr bhar kā dekhiye ab vo safar hai sāmne

gaañv lauTā shahr se jab koī bhī apnā na thā

bas vahī ik aam kā būḌhā shajar hai sāmne

aap hain main hun mohabbat ki Dagar hai samne

sochiye mat KHubsurat sa safar hai samne

aap ki aankhon ka manzar dekh kar lagta hai yun

jis se main raushan hua hun wo qamar hai samne

saya ban ke sath hai wo fasla phir bhi lage

aisi qurbat mein bhi duri ka asar hai samne

kya karun us moD par ye masala phir aa gaya

ek taraf dar hai KHuda ka tera ghar hai samne

zabt aisa tha ki patthar ho gaya ye dil mera

chashm-e-tar hun kyunki mera ham-safar hai samne

baat hoti to ye 'alam kya se kya hota magar

wo bhi chup hai main bhi chup hun aur nazar hai samne

zor-e-bazu aazmana hai agar ab aap ko

hath mein patthar uTha lo mera sar hai samne

jhurriyon mein gum hui bachpan ki sab ma'sumiyat

'umr bhar ka dekhiye ab wo safar hai samne

ganw lauTa shahr se jab koi bhi apna na tha

bas wahi ek aam ka buDha shajar hai samne